کیا ایسے دینی کیلنڈر کو مسجد میں لٹکانا جائز ہے جس پر کاروباری اشتہارات بھی درج ہوں؟

اوقاتِ نماز یا آیاتِ قرآنیہ و حدیثیہ کے کیلنڈر جو مساجد میں لگائے جاتے ہیں کیلنڈر شائع کرنے والا ان پر اپنا اشتہار بھی شائع کرتا ہے۔ اس طرح سے مسجد میں جب کیلنڈر لٹکایا جاتا ہے تو اوقاتِ نماز کی تعیین اور قرآن و حدیث کی تبلیغ کے ساتھ کاروبار کی اشاعت بھی ہورہی ہوتی ہے جوکہ مساجد میں جائز نہیں۔ کیونکہ مساجد میں دنیاوی اعلانات سے منع کیا گیا ہے۔مگر ان کیلنڈرز میں اصل اعلان نہیں ہوتا بلکہ اصل اوقات کی تعیین یا قرآن و حدیث کی تبلیغ مقصد ہوتا ہے اور اعلانات و اشتہارات اس کے تابع ہوتے ہیں۔ جواز و عدم جواز کےلئے اصل کا اعتبار ہوتا ہے نہ کہ تابع کا جیسے اذان جمعہ کے بعد بیع کرنا ناجائز ہے لیکن اگر کوئی شخص گھر سے نماز جمعہ کےلئے چلتا ہے اور ساتھ ہی کچھ سامان لے لیتا ہے جس کی راستے میں بیع کردیتا ہے تو اب یہ بیع جائز ہے۔ کیونکہ یہ سعی اس نے بیع کےلئے نہیں کیا بلکہ جمعہ کےلئے کی ہے اور تبعاً اسی سفر میں بیع بھی کرلی تو وہ جائز ہوگیا۔ اسی طرح سے مساجد میں کیلنڈر لٹکانے کا مقصد اوقات کا علم ہونا اور لوگوں کو قرآن و حدیث کے پیغامات پہنچانا ہوتا ہے تبعاً اعلانات و اشتہارات شائع کردئیے جاتے ہیں اس لیے ایسے کیلنڈر مساجد میں آویزاں کرنا جائز ہے۔
لیکن اگر ایسا ہو کہ کاروبار کی اشاعت والے کیلنڈر پر اگر کوئی آیت، حدیث یا اوقات نماز کا نقشہ بھی پرنٹ کردیا تو جائز نہیں ہوگا۔ کیونکہ اب اصل کاروبار کی اشاعت ٹھہرا۔ جو کہ مسجد میں ناجائز ہے۔ اورقاعدہ فقہیہ ہے:
التابع تابع۔
ترجمہ: تابع کا حکم تابع والا ہی ہے۔(۱)
یعنی تابع کو اصل بنانا جائز نہیں ہے۔ جبکہ تابع متبوع(اصل) کے حکم میں شامل ہے۔