کیا فوم اور اسپنچ کے گدوں پر نماز پڑھنا جائز ہے؟

نماز میں سجدہ اہم رکن ہے جس کے بغیر نماز نہیں ہے۔ لہٰذا اصلاحِ نماز کے لیے اصلاحِ سجدہ ضروری ہے۔ اور اصلاحِ سجدہ کےلیے پیشانی کا زمین پر ٹکنا ضروری ہے۔ کیونکہ سجدہ کی تعریف فقہاء نے کی ہے:
وضع الجبھۃ علی الارض۔ (1)
ترجمہ: سجدہ پیشانی کو زمین پر رکھ دینے کا نام ہے۔
اور زمین سے مراد، زمین اور مثلِ زمین ہے۔ جیسے فرش، چھت، لکڑی، لوہے یا پلاسٹک کا پھٹہ وغیرہ بھی شامل ہیں۔ یعنی سجدہ کی جگہ زمین جتنی سخت ہو۔
اس کے بعد آتے ہیں اپنے مسئلہ کی طرف کہ بعض اوقات قالین کے نیچے فوم ڈال دیا جاتا ہے جس سے جگہ نرم ہوجاتی ہے۔ اور یہ فوم ہلکا بھی ہوتا ہے اور ذرا موٹابھی ہوتا ہے۔ یا ایسے بھی ہوتا ہے کہ نیچے فوم ڈالا جاتا ہے اور قالین بھی کافی نرم ہوتا ہے۔ ایسی صورتوں میں بعض پر تو دوران سجدہ پیشانی اور ماتھا بآسانی زمین پر ٹکتے ہیں اور بعض زیادہ نرم ہوتے ہیں کہ ان پر نہیں صحیح طریقہ پر نہیں ٹکتے۔ اور ایسے ہی اسپنچ کے گدے تو بہت زیادہ نرم ہوتے ہیں۔ ان سب کو اوپر بیان کردہ تعریف کے تناظر میں جانچا جائے گا کہ جس پر سجدہ کی حالت میں پیشانی اس سختی کے ساتھ ٹک سکے جس سے زمین پر ٹکتی ہے تو سجدہ درست ہوگا اور نماز بھی درست ہوگی ورنہ سجدہ درست نہ ہوگا اور نماز بھی نہیں۔ چاہے وہ کچھ نرم بھی ہو لیکن پیشانی دباؤ کے ساتھ ٹک جائے تو درست ہے۔