نماز میں خُمرہ (خمرۃ) سے کیا مراد ہے اور اس کا شرعی مفہوم کیا ہے؟

ابن قلیج مغلطائی الحنفی خمرہ کی تعریف کرتے ہیں:
الخمرۃ حصیرۃ تنسج من السعف اصغر من المصلی۔ (1)
ترجمہ: خمرہ چٹائی ہے جسے کھجور کے پتوں اور شاخوں سے بنا جاتا ہے یہ مصلی سے چھوٹا ہوتا ہے۔
بدرالدین عینی علیہ الرحمہ فرماتے ہیں:
الخمرۃ کالحصیر الصغیر یعمل من سعف النخل ، وینسج بالسیور والخیوط، وھی علی قدر ما یوضع علیہ الوجہ والانف، فاذا کبرت عن ذلک فھی حصیر۔ (2)
ترجمہ: خمرہ چھوٹی چٹائی کی طرح ہوتا ہے جسے کھجور کے پتوں وغیرہ سے بنایا جاتا ہے، اور اسے تسموں اور دھاگوں سے بناجاتا ہے۔ اور یہ اس مقدار میں ہوتا ہے کہ اس پر چہرہ اور ناک رکھی جاسکے اگر یہ بڑا ہوجائے تو یہی چٹائی ہے۔
سنن ابی داود میں حدیث ام المومنین میمونہ رضی اللہ عنہ(3) پر شرح کرتے ہوئے بدرالدین عینی الحنفی فرماتے ہیں:
جواز الصلوۃ علی الخمرۃ من غیر کراھۃ۔ (4)
ترجمہ: خمرہ پر نماز پڑھنا بغیر کراہت جائز ہے۔
اور مزید فرمایا:
وفعلہ جابربن عبداللہ، وابوذر، وزید بن ثابت، وابن عمر وقال ابن المسیب: الصلاۃ علی الخمرۃ سنۃ۔ (5)
ترجمہ: حضرت جابر بن عبداللہ، ابوذرغفاری، زیدبن ثابت اور عبداللہ بن عمر رضی اللہ عنہم نے بھی ایسا ہی کیا اور حضرت سعید بن المسیب رحمہ اللہ فرماتے ہیں: خمرہ پر نماز پڑھنا سنت ہے۔
جواز الصلوۃ علی الحصیر من غیر کراھۃ، وفی معناہ: کل شیء یعمل من نبات الارض وھذا اجماع۔ (6)
ترجمہ: چٹائی پر نماز پڑھنا بلاکراہت جائز ہے اور اس کے معنی میں ہر وہ چیز جو زمین کی پیداوار سے ہوگی وہ بھی شامل ہے(یعنی اس پیداوار سے اگر چٹائی وغیرہ بنائی جائے) اور یہ اجماع ہے۔
ان مذکورہ بالا احادیث اور ان پر علامہ بدرالدین اور مغلطائی علیہما الرحمہ کی مفصل توضیح کے بعد واضح ہوا کہ صف، چٹائی، دری اور قالین پر نماز پڑھنا جائز ہے۔