کیا پُرامن اور اطمینان بخش سفر میں بھی نمازِ قصر کرنا ضروری ہے؟

مشکلات سے خالی، پرامن اور اطمینان بخش سفر میں بھی نماز کو قصر ہی کیا جائے گا؟ یہ ایسا سوال ہے جو عام ذہن میں پیدا ہوتا ہے۔ کیونکہ اس دور میں سفری مشکلات وہ نہیں رہی جو پہلے زمانوں میں تھیں۔ اس کا جواب یہ ہے کہ سفر میں قصر ہی کی جائے گی۔ کیونکہ رسول اللہﷺ سے آثار مروی ہیں آپﷺ نے پرامن حالات میں بھی قصر ہی پڑھی ہے۔ کہ جب خوفناک اور پرامن سفر میں ایک ہی حکم ہے تو بالکل مشکل اور آسان سفر میں بھی ایک ہی ہے۔یعلی بن امیہ کہتے ہیں کہ میں نے حضرت عمر بن خطاب رضی اللہ عنہ سے سوال کیا: کہ تم کہتے ہو(کہ قرآن کی اس آیت کو بیان فرما کر فتویٰ دیتے ہو)":
" وَاِذَا ضَرَبْتُمْ فِي الْاَرْضِ فَلَيْسَ عَلَيْكُمْ جُنَاحٌ اَنْ تَقْصُرُوْا مِنَ الصَّلٰوةِ، اِنْ خِفْتُمْ اَنْ يَّفْتِنَكُمُ الَّذِيْنَ كَفَرُوْا۔" (1)
ترجمہ: اور جب تم زمین میں سفر کرو تو تم پر کوئی گناہ نہیں کہ تم نماز میں قصر کرو (یعنی چار رکعت فرض کی جگہ دو پڑھو) اگر تمہیں اندیشہ ہے کہ کافر تمہیں تکلیف میں مبتلا کردیں گے۔"
اور اللہ نے لوگوں کو امن دے دیا ہے(تو اب بھی یہ حکم باقی ہے کیا)؟تو حضرت عمر رضی اللہ عنہ نے فرمایا: مجھے ایسا ہی تعجب ہوا تھا جیسا کہ تجھے ہوا، میں نے رسول اللہﷺ سے سوال کیا تو آپﷺ نے فرمایا:
صدقۃ تصدق اللہ بھا علیکم، فاقبلوا صدقتہ۔(2)
یہ اللہ نے تم پر صدقہ کیا ہے، اس کے صدقہ کو قبول کرو۔
اللہ رب العزت نے نماز میں قصر کوحالت خوف سے خاص کیا ہے مگر رسول اللہﷺ نے اسے امن وخوف دونوں حالتوں میں عام کردیا۔ اور جب سفر کی تنگی اور مشکل سے قصر کو خاص ہی نہیں کیا تو تنگی اور مشکل مٹ جانے پر اطمینان بخش اور آرام دہ سفر میں قصر کا حکم ختم کیسے ہوگا؟
حضرت عبداللہ بن عباس رضی اللہ عنہ فرماتے ہیں:
صلینا مع رسول اللہﷺ بین مکۃ والمدینۃ، ونحن آمنون، لا نخاف بینھما، رکعتین رکعتین۔ (3)
ترجمہ: ہم نے مکہ اور مدینہ کے درمیان رسول اللہﷺ کے ساتھ دو دورکعتیں (قصر)نماز پڑھی حالانکہ ہم امن کی حالت میں تھے ہمیں کوئی خوف نہ تھا۔
ان روایات سے تو یہ ثابت ہواکہ امن واطمینان حکم میں تبدیل کا باعث نہیں بن سکتے۔ اور اس کے بعد دوسری وضاحت یہ ہے کہ بعض صحابہ کرام علیہم الرضوان کا موقف ہی یہ ہے کہ سفر میں نماز کی رکعتیں ہی دو فرض ہیں۔ یعنی اس میں خوف وامن، تنگی وآسانی کا کوئی فرق نہیں۔
امام سیوطی نے سماک الحنفی سے روایت کیا ہے کہ میں نے حضرت عبداللہ بن عمر رضی اللہ عنہ سے سفر کی نماز کے بارے سوال کیاتو انہوں نے فرمایا:
رکعتان تمام غیر قصر۔ (4)
ترجمہ: دو رکعتیں ہی پوری نماز ہے قصر نہیں ہے۔
اور حضرت عائشہ صدیقہ رضی اللہ تعالیٰ عنہا سے روایت کرتے ہیں آپ نے فرمایا:
فرضت الصلوۃ رکعتین رکعتین، فی السفر والحضر، فاقرت صلوۃ السفر، وزید فی صلوۃ الحضر۔ (5)
ترجمہ: نماز سفر وحضر(حالت اقامت) میں دودورکعتیں فرض ہوئی تھی، پھر سفر کی نماز (دورکعتیں)برقرار رہی، اور حالت اقامت کی نماز بڑھا دی گئی۔
دوسری قسم کی روایات سے خوب واضح ہوگیا کہ قصر کا حکم خوف یا مشکل سے خاص نہیں بلکہ سفر کی نماز ہی دورکعتیں ہیں سوائے مغرب کے، کہ وہ سفر وحضر میں تین ہیں، لہٰذا سفر جتنا بھی آرام دہ اور سکون دہ ہو نماز قصر ہی کی ادا کی جائے گی۔
نصوصِ شرعیہ کی دو اقسام ہیں:
معلول غیر معلول
امام السرخسی فرماتے ہیں:
ان النصوص نوعان: معلول وغیر معلول۔ (6)
ترجمہ: (احکام شرعیہ کی)نصوص دو اقسام کی ہیں: معلول اور غیر معلول۔
معلول ہونے کا مقصد یہ ہے کہ جس علت کی بناء پر حکم لگایا گیا ہے، جب تک وہ علت باقی رہے گی حکم ثابت رہے گا اور جب علت رفع ہوجائے گی تو حکم بھی ساقط ہوجائے گا۔ اور ایسے ہی وہ علت کسی اور جگہ پائی جائے گی تو اس فرع میں بھی وہ حکم ثابت ہوجائے گا، جیسے اس اصل میں تھا۔ جیسے حضور نبی کریمﷺ نے ٹخنے سے نیچے کپڑا لٹکانے کو حرام قرار دیا، اور اس میں خود ہی علت"تکبر" بیان فرمادی۔ (7)
جب لٹکے ہوئے کپڑے میں یہ علت باقی نہیں رہے گی تو حکم بھی اٹھ جائے گا جیسے حضرت ابوبکر صدیق رضی اللہ عنہ کو اجازت عطا فرمانا۔ (8) اور ایسے ہی جس عمل میں تکبر ہوگا وہ عمل حرام قرار پائے گا۔
مگر زیرِ بحث مسئلہ میں مندرجہ بالا روایات سے واضح ہوگیا کہ قصر الصلوۃ کی نص معلول نہیں ہے۔ جب معلول نہیں کسی چیز کو بھی علت بنا کر اس کے وجود اور عدم وجود کی صورت میں حکم تبدیل نہیں کیا جاسکتا۔