کیا میت کو غسل دینے والے شخص پر خود غسل کرنا واجب ہے؟

لوگوں کے ہاں یہ تصور قائم ہے کہ جو شخص میت کو غسل دیتا ہے اس پر غسل کرنا فرض ہوتا ہے۔ میت کو غسل دینے کے بعد اگر خود غسل نہ کرے تو اسے نماز جنازہ میں شریک ہونے سے منع کیا جاتا ہے۔ مگر اس کی دین میں کوئی اصل نہیں ہے۔ یعنی یہ مسئلہ اصل میں لوگوں کا من گھڑت ہے۔
جن چیزوں سے مرد یا عورت پر غسل واجب ہوتا ہے وہ تمام نواقض غسل(غسل کو توڑنے والی چیزیں) فقہ کی کتابوں میں مکمل تفصیل سے بیان کی گئی ہیں۔ اور اس بے اصل مسئلہ کو آج تک کتب فقہ میں کسی نے بیان نہیں کیا ہے۔ جس سے صاف ظاہر ہے کہ یہ بالکل جہلاء کا جاہلانہ نظریہ ہے جس کا شریعت سے کوئی تعلق نہیں ہے۔
لہٰذا میت کو غسل دینے والے کےلیے نیا غسل کرنا فرض نہیں ہے اور وہ بغیر نیا غسل کیے نمازِ جنازہ بھی ادا کر سکتا ہے۔