کیا پیشاب کی نلکی سے پیشاب خارج ہونے کی صورت میں وضو لازم ہو جاتا ہے؟

پیشاب کا اپنے مخرج سے خارج ہونا حدث کو لاحق کر دیتا ہے۔ جب پیشاب اپنے مخرج سے خارج ہو گیا پھر وہ زمین پر جائے، کسی برتن میں جائے یا نلکی میں جائے ہر طرح سے وضو ٹوٹ جائے گا۔ کیونکہ پیشاب کا خروج ہی حدث لاحق کر دیتا ہے۔ صاحب قدوری علیہ الرحمہ فرماتے ہیں:
ومعانی الناقضۃ للوضوء ، کل ما خرج من السبیلین۔ (1)
ترجمہ: ہر وہ چیز جو دونوں راستوں میں سے خارج ہو وضو کو توڑنے والی ہے۔
نقض وضو کےلئے سبیلین سے خروج کی شرط ہے لہٰذا جب خروج ہوگیا تو حدث لاحق ہوگیا۔اگر اس نلکی میں سے مسلسل پیشاب جاری رہے تو معذور کی حالت میں ہو جائے گا اور ہر نماز کے وقت میں وضو کرنا لازم ہوگا۔مگر اس نلکی سے پیشاب کا آنا ایسے ہی ہے جیسے زمین پر بیٹھ کر پیشاب کر دیا جائے۔ معذور ہونے کا مطلب یہ نہیں ہوتا کہ معذوری کی وجہ سے ناقض وضو کے پائے جانے کے باوجود وضو نہیں ٹوٹتا۔ بلکہ اس کا مطلب یہ ہے کہ وضو تو ٹوٹتا ہے مگر باربار اور بہت زیادہ بار ٹوٹنے کی وجہ سے ہر بار نیا وضو کرنا مشکل ہے۔ لہٰذا شریعت نے رعایتاً ایک نماز کا وقت نیا وضو نہ کرنے کی رخصت دے دی۔ یعنی یہ مشکل کی وجہ سے ایک نماز کے وقت میں ایک سے زائد بار وضو نہ کرنے کی رخصت ہے۔
حوالہ:
1 ۔ قدوری ، مختصر ، کتاب الطھارۃ ، نواقض الوضوء ، ص : 54,55